जयसिंगपूर, (प्रतिनिधी) : शिरोळ तालुक्यातील उदगाव येथील कृष्णा नदीच्या जॅकवेल परिसरामध्ये धक्कादायक घटना घडली आहे. मुलाच्या वाढदिवसाची पार्टी करण्यासाठी गेलेल्या लखन सुरेश घावट ऊर्फ बागडी (वय ३५, रा. जयसिंगपूर) या तरुणाची रविवारी (ता.२६) दुपारी किरकोळ कारणावरून झालेल्या वादातून दगडाने ठेचून हत्या करण्यात आली. अवघ्या एका आठवड्यात शहरातील ही दुसरी खुनाची घटना असल्याने परिसरात मोठी खळबळ उडाली आहे.
नेमके काय घडले?
लखन बागडी हा आपल्या मुलाचा वाढदिवस साजरा करण्यासाठी पाच मित्रांसोबत उदगावच्या कृष्णा नदीच्या पात्राजवळ गेला होता. या सामूहिक पार्टीदरम्यान त्यांच्यात काहीतरी क्षुल्लक विषयावरून वाद सुरू झाला. या वादाने लगेचच हिंसक रूप धारण केले आणि मित्रांनी मिळून लखनवर हल्ला चढवला. या झटापटीत एका साथीदाराने दगडाने लखनच्या डोक्यावर जोरदार प्रहार केला.
गंभीररित्या जखमी झालेल्या लखनला तातडीने सांगली येथील रुग्णालयात दाखल करण्यात आले, मात्र उपचारादरम्यान त्याचा मृत्यू झाला.
सहा जणांविरुद्ध गुन्हा दाखल
या खुनाच्या घटनेप्रकरणी मृताचा भाऊ योगेश सुरेश घावट यांनी जयसिंगपूर पोलीस ठाण्यात फिर्याद दिली आहे. त्यानुसार, अक्षय माने, संकेत हंबर, अमीन राजपूत, अमित सांगावकर, प्रथमेश ऊर्फ गोट्या पवार आणि अरविंद माळी (सर्व रा. जयसिंगपूर) या सहा जणांविरुद्ध खुनाचा गुन्हा नोंद करण्यात आला आहे.
जयसिंगपूर पोलिसांनी तपास जलदगतीने करत रात्री उशिरापर्यंत चौघा आरोपींना अटक केली असून, उर्वरित दोघांचा शोध घेण्यासाठी पोलीस पथके रवाना झाली आहेत. सलग दुसऱ्या खुनाच्या घटनेमुळे नागरिकांमध्ये भीतीचे वातावरण असून, कायदा आणि सुव्यवस्था राखण्यासाठी पोलीस प्रशासनासमोर मोठे आव्हान उभे राहिले आहे.