सांगली, ता.२४: केंद्रीय दक्षता आयोगाच्या निर्देशानुसार, महाराष्ट्र राज्यात २७ ऑक्टोबर २०२५ ते २ नोव्हेंबर २०२५ या कालावधीत ‘दक्षता जनजागृती सप्ताह’ आयोजित करण्यात आला आहे. या सप्ताहाच्या निमित्ताने, लाचलुचपत प्रतिबंधक विभागाची (ACB) कार्यपद्धती सामान्य नागरिकांपर्यंत पोहोचवून भ्रष्टाचारविरोधी जनजागृती करण्याचे उद्दिष्ट ठेवण्यात आले आहे. या सप्ताहात जिल्ह्यात विविध कार्यक्रमांचे आयोजन करण्यात आले असल्याची माहिती ॲन्टी करप्शन ब्युरो, सांगलीच्या पोलीस उप अधीक्षक यास्मीन इनामदार यांनी प्रसिद्धीपत्रकाद्वारे दिली आहे.
सप्ताहात मार्गदर्शन व माहितीचे वाटप
या सप्ताह काळात प्रामुख्याने भ्रष्टाचाराशी संबंधित कारवाईबाबत नागरिकांना मार्गदर्शन केले जाणार आहे. तसेच, विविध सामाजिक संस्था आणि गाव पातळीवरील नागरिकांशी संपर्क साधून त्यांना माहिती दिली जाईल. याव्यतिरिक्त, सर्व शासकीय कार्यालयांच्या ठिकाणी भ्रष्टाचारविरोधी संदेश देणारे घोषवाक्य आणि बॅनर्स लावले जाणार आहेत, जेणेकरून प्रशासनात पारदर्शकता राखण्यास मदत होईल.
भ्रष्टाचार प्रतिबंध विभागाची कारवाई पद्धत:
लाचलुचपत प्रतिबंधक विभागामार्फत (ACB) भ्रष्ट लोकसेवकांविरुद्ध खालील तीन प्रमुख प्रकारांमध्ये कारवाई केली जाते:
- अपसंपदेची चौकशी (Disproportionate Assets): नावानिशी किंवा निनावी तक्रारीवरून, लोकसेवकाने भ्रष्टाचारातून घर, मोटारगाड्या, दुकाने, प्लॉट किंवा शेतजमिनी यांसारखी स्थावर मालमत्ता जमा केली असल्यास, त्याची चौकशी केली जाते.
- पडताळणी व लाचेचा सापळा (Trap Cases): तक्रारदाराने लाचेची मागणी करणाऱ्या लोकसेवकाविरुद्ध समक्ष तक्रार केल्यास, लाचेचा सापळा आयोजित करून भ्रष्ट लोकसेवकास रंगेहाथ पकडून तातडीने कारवाई केली जाते.
- पदाचा दुरुपयोगाबाबतची चौकशी (Misuse of Office): लोकसेवकाने आपल्या पदाचा गैरवापर करून शासकीय मालमत्तेचे नुकसान करणे किंवा वैयक्तिक फायद्यासाठी वापर करणे, अशा प्रकरणांची चौकशी केली जाते. अशा तक्रारी संबंधित विभागाकडून लाचलुचपत प्रतिबंधक विभागाकडे पाठवल्या जातात.
तक्रारीसाठी संपर्क साधा
राज्य सरकारचे अधिकारी, कर्मचारी, शासन अनुदानीत संस्था, किंवा स्थानिक स्वराज्य संस्थांमधील (महापालिका, नगरपालिका, जिल्हा परिषद, ग्रामपंचायत) अधिकारी किंवा कर्मचारी लाचेची मागणी करत असल्यास, नागरिकांनी तात्काळ तक्रार नोंदवावी.
तक्रारीसाठीचे संपर्क क्रमांक:
- पोलीस उप अधीक्षक, ॲन्टी करप्शन ब्युरो, सांगली
- कार्यालय: बदाम चौक, पोलीस लाईन शेजारी, सांगली.
- टोल फ्री नंबर: 1064
- मोबाईल क्रमांक: 9404041064
- फोन क्रमांक: 0233-2373095
- ॲन्टी करप्शन ब्युरो, पुणे (पोलीस उपआयुक्त / पोलीस अधीक्षक कार्यालय)
- सेंट्रल बिल्डींग, सी बॅरॅक.
- फोन क्रमांक: 020-26122134
याशिवाय, नागरिकांना भ्रष्टाचार प्रतिबंध विभागाच्या मोबाईल ॲपचा (डाउनलोड करण्यासाठी: www.acbmaharashtra.net) देखील वापर करता येणार आहे.