सांगली, ता.१८:सांगली-मिरज-कुपवाड शहर महानगरपालिका हद्दीतून जाणाऱ्या कोल्हापूर रस्त्याच्या रुंदीकरण प्रकल्पाला गती देण्यासाठी, रस्त्याच्या मार्गातील पिण्याच्या पाण्याची पाईपलाईन स्थलांतरित करण्याचे काम येत्या ८ दिवसांत पूर्ण करण्याची योजना महानगरपालिकेच्या पाणी पुरवठा विभागाने आखली आहे. महापालिका आयुक्त श्री. सत्यम गांधी यांनी या कामासाठी सार्वजनिक बांधकाम विभागाला (PWD) सर्वतोपरी सहकार्य करण्याची ग्वाही दिली आहे.
पाणी पुरवठा विभागाचे तातडीचे नियोजन आयुक्त सत्यम गांधी यांच्या आदेशानुसार, पाणी पुरवठा विभागाने तातडीने कामाला सुरुवात केली आहे. कार्यकारी अभियंता चिदानंद कुरणे आणि उप अभियंता अमीर हमजा मुलानी यांच्या नियंत्रणाखाली तांत्रिक कर्मचाऱ्यांसह स्थलांतरित कराव्या लागणाऱ्या पाईपलाईनच्या लाईन-आऊटची (Line-out) पाहणी करून नियोजन निश्चित करण्यात येत आहे.
कामाचा तपशील:
- पाईपलाईनची एकूण लांबी: १२०० मीटर (१.२ किलोमीटर) (रस्त्याच्या दोन्ही बाजूंनी ६०० मीटर + ६०० मीटर).
- पाईपचा प्रकार: २०० एमएम (MM) एचडीपीई (HDPE) नवीन पाईपलाईन टाकण्यात येणार आहे.
- कामाची पूर्णता: सार्वजनिक बांधकाम विभागाने भूयारी गटार (Underground Drainage) संबंधित मार्किंग करून दिल्याबरोबर ८ दिवसांत नवीन पाईपलाईन टाकण्याचे काम पूर्ण करण्यात येणार आहे.
- या कामासाठी आवश्यक असलेली पाईपलाईन प्रशासनाने उपलब्ध करून घेतली आहे, त्यामुळे रस्तारुंदीकरणाचा हा महत्त्वाचा अडथळा लवकरच दूर होईल.