मिरज, ता. १९ : मिरज तालुक्यातील मल्लेवाडी येथे दोन दुचाकीचा भीषण अपघातात दिनकर रामकृष्ण जाधव (वय २७, संतोषवाडी ता. मिरज) हा तरुण ठार झाला आहे. सदर घटना शुक्रवारी (ता. १८) रात्री अकराच्या सुमारास मल्लेवाडी-एरंडोली रस्त्यावर एका शाळेजवळ घडली आहे. याबाबत मिरज ग्रामीण पोलिस ठाण्यात अपघाताची नोंद झाली आहे.
पोलिसांनी दिलेली माहितीनुसार दिनकर जाधव हा तरुण मिरजेला कामानिमित्त आला होता. तेथून तो परत गावी संतोषवाडीकडे जात असताना मल्लेवाडी जवळ असलेल्या शाळेजवळ समोरून आलेल्या दुचाकीला जाधव याने धडक दिली. या धडकेत दिनकर गंभीर जखमी झाला व त्याचा मृत्यू झाला आहे. या अपघातात दुसऱ्या दुचाकीवरील ही दुचाकीस्वार जखमी झाला. सदर घटना रात्री झाली असून गावातील नागरीकांनी घटनेची माहिती पोलिसांत दिली. या घटनेची नोंद मिरज ग्रामीण पोलिसात करण्यात आली आहे. यापुढील अधिक तपास पोलीस करीत आहे.