अखेर ‘बिगुल’ वाजला! राज्याच्या २९ महानगरपालिका निवडणुका जाहीर

१५ जानेवारीला मतदान, १६ जानेवारीला निकाल

सांगली टुडे वृत्तसेवा |

मुंबई (विशेष प्रतिनिधी), ता.१५ : राज्यातील अनेक वर्षांपासून प्रलंबित असलेल्या २९ महानगरपालिकांच्या सार्वत्रिक निवडणुकांचा बहुप्रतिक्षित कार्यक्रम महाराष्ट्र राज्य निवडणूक आयोगाने (State Election Commission) आज, १५ डिसेंबर २०२५ रोजी जाहीर केला. सर्वोच्च न्यायालयाच्या निर्देशानुसार जानेवारी २०२६ पर्यंत ही निवडणूक प्रक्रिया पूर्ण करणे बंधनकारक असल्यामुळे, आयोगाने तातडीने हा निर्णय घेतला आहे. या घोषणेमुळे राज्यातील मुंबई, पुणे, नागपूर, नाशिक, पिंपरी-चिंचवडसह सर्व मोठ्या शहरांमध्ये आता निवडणूक आचारसंहिता लागू झाली आहे.

एकाच टप्प्यात २९ महापालिकांसाठी मतदानराज्य निवडणूक आयुक्त दिनेश वाघमारे यांनी पत्रकार परिषदेत या निवडणूक कार्यक्रमाची घोषणा केली. राज्यातील २९ महापालिकांमधील एकूण २८६९ जागांसाठी एकाच टप्प्यात मतदान होणार आहे. या जागांसाठी लाखो मतदार आपला मतदानाचा हक्क बजावणार आहेत.

निवडणुकीचा सविस्तर कार्यक्रम:

• आचार संहिता लागू१५ डिसेंबर २०२५ (आजपासून त्वरित)
• नामनिर्देशन पत्र (अर्ज) स्वीकारणे२३ डिसेंबर २०२५ ते ३० डिसेंबर २०२५
• अर्जांची छाननी३१ डिसेंबर २०२५
• उमेदवारी अर्ज माघार घेण्याची मुदत २ जानेवारी २०२६
• अंतिम उमेदवारांची यादी जाहीर ३ जानेवारी २०२६
• मतदान दि.१५ जानेवारी २०२६ (गुरुवार)
• मतमोजणी व निकाल १६ जानेवारी २०२६ (शुक्रवार)

आरक्षण आणि इतर महत्त्वाच्या बाबीराज्यात ओबीसी आरक्षणाचा मुद्दा प्रलंबित राहिल्यानंतरही, आयोगाने कायद्यातील तरतुदी आणि सर्वोच्च न्यायालयाच्या आदेशाचे पालन करत निवडणुकीची घोषणा केली आहे. एकूण २८६९ जागांपैकी सुमारे १४४२ जागा महिलांसाठी राखीव ठेवण्यात येणार आहेत.

नामनिर्देशनासाठी ऑफलाईन सुविधा :

इच्छुक उमेदवार आणि राजकीय पक्षांच्या मागणीनुसार, आयोगाने नामनिर्देशन पत्र (Nomination Form) भरण्यासाठी ऑफलाईन (Offline) सुविधा उपलब्ध करून दिली आहे. निवडणूक जाहीर झाल्यामुळे आता सर्वच राजकीय पक्षांची लगबग वाढली असून, उमेदवारी अर्ज भरण्याची प्रक्रिया २३ डिसेंबरपासून सुरू होणार आहे.