मिरज, ता.२९: राज्याच्या राजकारणात सक्रिय असलेल्या शिवसेना पक्षात (शिंदे गट) सांगली जिल्ह्यातील संघटनेमध्ये मोठे फेरबदल करण्यात आले आहेत. सांगली येथील निष्ठावान कार्यकर्ते मोहन वनखंडे सर यांची शिवसेनेच्या ‘प्रभारी महानगर प्रमुख’ पदी नियुक्ती करण्यात आली आहे. उपमुख्यमंत्री व शिवसेना मुख्य नेते एकनाथजी शिंदे यांच्या आदेशानुसार ही महत्त्वाची जबाबदारी त्यांच्या खांद्यावर सोपवण्यात आली आहे.
शिवसेना सचिव संजय पुष्पलता भाऊराव मोरे यांनी अधिकृत नियुक्ती पत्र जारी केले आहे. वनखंडे सर यांच्या कार्यक्षेत्रामध्ये सांगली, मिरज व कुपवाड महानगर क्षेत्राचा समावेश आहे. याव्यतिरिक्त, संघटनात्मक वाढीच्या दृष्टीने कवलापूर, मालगाव, मैशाल आणि भोसे या चार महत्त्वाच्या जिल्हा परिषद गटांची जबाबदारी देखील त्यांच्याकडे सोपवण्यात आली आहे. नियुक्ती पत्रात स्पष्ट करण्यात आले आहे की, वनखंडे सरांनी ‘वंदनीय हिंदुहृदयसम्राट शिवसेनाप्रमुख बाळासाहेब ठाकरे यांचा हिंदुत्वाचा विचार’ आणि ‘धर्मवीर आनंद दिघे साहेब यांची शिकवण’ यांचा सक्रियपणे प्रचार व प्रसार करावा. तसेच, शिवसेना पक्ष वाढीसाठी सर्वांना सोबत घेऊन एकजुटीने कार्य करावे, असा विश्वास पक्षाने व्यक्त केला आहे. या नियुक्तीमुळे सांगली परिसरातील शिवसेना कार्यकर्त्यांना नवा उत्साह मिळेल आणि आगामी काळात पक्षाचे काम अधिक मजबूत होईल, अशी अपेक्षा व्यक्त केली जात आहे.