वायफळे येथे जुन्या वादातून सहा जणांवर धारदार शस्त्राने हल्ला; हल्ल्यात एकचा मृत्यू

तासगाव | प्रतिनिधी

तासगाव तालुक्यातील वायफळे येथे जुन्या वादातून सहा जणांवर धारदार शस्त्राने प्राणघातक हल्ला करण्यात आला. जखमींना खासगी रुग्णालयात उपचारास नेले असता या हल्ल्यातिल ओंकार उर्फ रोहित संजय फाळके, वय २४ या तरुणाचा उपचारादरम्यान मृत्यू झाला आहे. या हल्ल्यात संजय दामू फाळके, जयश्री संजय फाळके, सिकंदर अस्लम शिकलगार (सर्व रा. वायफळे, ता. तासगाव), आदित्य गजानन साठे, आशिष गजानन साठे (दोघेही रा. कुची, ता. कवठेमहांकाळ), हे जखमीं झाले आहेत. ही घटना बस स्थानक चौक आणि दलित वस्तीत येथे घडली आहे. प्रकाराने वायफळे येथे भीतीचे वातावरण झाले आहे.

याबाबत पोलिसांकडून मिळालेल्या माहितीनुसार, वायफळे येथील फाळके कुटुंबीयांमध्ये गेल्या अनेक वर्षांपासून किरकोळ कारणांवरून वाद सुरू आहेत. दोन्ही कुटुंबातून एकमेकांवर यापूर्वीही धारदार शस्त्राने हल्ले झाले आहेत. याप्रकरणी दोन्ही बाजूंकडून पोलीस ठाण्यात गुन्हे दाखल झाले होते. काही वर्षात दोन्ही कुटुंबांमधील हा वाद चिघळत चालला होता. एकमेकांना बघून घेण्याच्या धमक्या दिल्या जात होत्या.

गुरुवारी सायंकाळी सहा वाजण्याच्या दरम्यान दहा ते बारा जणांची टोळक्याने दुचाकीवरून वायफळे येथील बसस्थानक चौकात येऊन तिथे उभ्या असणाऱ्या ओंकारवर हल्ला चढवला. ओंकारसोबत त्याचे मामांची दोन मुले आदित्य आणि आशिष साठे या दोघांवरही धारदार शस्त्राने हल्ला करण्यात आला. या हल्ल्यातून ओंकारने घराकडे पळ काढला. बस स्थानक चौकात बसलेल्या सिकंदर शिकलगार (रा. वायफळे) यांच्यावरही या टोळक्याने विनाकारण हल्ला केला. त्यांच्या खांद्याला गंभीर जखम झाली आहे. हल्ला केल्यानंतर हे टोळके भर चौकातून नंग्या तलवारी नाचवत ओंकारच्या घराकडे जाऊन घरासमोर ओंकारवर हल्ला चढवला. ओंकारचे आई जयश्री व वडील संजय हे सोडवण्यास मध्ये आले असता धारदार शस्त्राने हल्ला मारहाण करण्यात आली. सर्वचजण रक्ताच्या थारोळ्यात पडले होते. त्यानंतर या टोळक्याने मोटरसायकल वरून पसार झाले.

घटनेची माहिती मिळताच पोलीस उपाधीक्षक सचिन थोरबोले, पोलीस निरीक्षक सोमनाथ वाघ यांच्यासह पोलिसांनी वायफळे येथिल घटनास्थळी धाव घेतली. वायफळे बसस्थानक चौकातील या घटनेचा प्रकार सीसीटीव्हीमध्ये कैद झाला आहे. सीसीटीव्हीमधील फुटेजवरून हल्लेखोरांचा शोध सुरू आहे. याप्रकरणी रात्री उशिरापर्यंत याप्रकरणी फिर्याद घेण्याचे काम सुरू होते. हल्लेखोरांच्या शोधासाठी तासगाव पोलिसांसह स्थानिक गुन्हे अन्वेषण शाखेची शोध काम सुरू आहे.